26 January 2009

ತಿಳಿಮುಗಿಲ ತೊಟ್ಟಿಲಲಿ...

ನಿನ್ನೆ(೨೫ನೇ ಜನವರಿ ೨೦೦೯) ಸ್ನೇಹಿತರ ಜೊತೆ ಮೇಲುಕೋಟೆ ಚೆಲುವ ನಾರಾಯಣ ಸ್ವಾಮಿ ಹಾಗೂ ಯೋಗಾನರಸಿಂಹರನ್ನು ನೋಡಲು ಹೋಗಿದ್ದೆ. ಅಲ್ಲಿ ಬೆಟ್ಟದ ಮೇಲೆ ಯೋಗಾನರಸಿಂಹ ದೇವಸ್ಥಾನವಿದೆ. ಅಲ್ಲಿ ದೇವಸ್ಥಾನದ ಒಳಗೆ ಒಂದು ಸೀಡಿ/ಕ್ಯಾಸೆಟ್ ಅಂಗಡಿ ಇದೆ. ದೇವರ ದರ್ಶನ ಆದ ಮೇಲೆ ಹೊರಗೆ ಬರುವಾಗ ೧-೨ ಕನ್ನಡ ಸುಗಮ ಸಂಗೀತದ ಸಿಡಿ ಕೊಳ್ಳುವ ಯೋಚನೆಯಾಯಿತು. ಅಲ್ಲಿ ಇದ್ದುದರಲ್ಲಿ ಆರಿಸಿ ಮೈಸೂರು ಅನಂತಸ್ವಾಮಿಯವರ "ಎದೆ ತುಂಬಿ ಹಾಡುವೆನು" ಹಾಗೂ ಶಿವಮೊಗ್ಗ ಸುಬ್ಬಣ್ಣ ಅವರ "ಆನಂದಮಯ" ಸೀಡಿಗಳನ್ನು ಕೊಂಡೆ. ಸಂಜೆ ಮನೆಗೆ ವಾಪಸ್ಸಾದ ಮೇಲೆ ಸುಸ್ತಾಗಿದ್ದರೂ ಕೇಳುವ ಮನಸಾಯಿತು. ಮೊದಲು ಅನಂತಸ್ವಾಮಿಯವರ ಹಾಡುಗಳನ್ನು ಕೇಳಲು ಶುರು ಮಾಡಿದೆ.ಮೊದಲ ೭ ಹಾಡುಗಳು ಮುಗಿದ ಮೇಲೆ ಸುನೀತಾ ಅನಂತಸ್ವಾಮಿ ಹಾಡಲು ಶುರು ಮಾಡಿದರು. "ತಿಳಿಮುಗಿಲ ತೊಟ್ಟಿಲಲಿ ಮಲಗಿದ್ದ ಚಂದಿರನ ..." ಆಹಾ ಎಂಥಾ ಹಾಡು !!! ಡಾ|| ಎಸ್. ವಿ. ಪರಮೇಶ್ವರ ಭಟ್ಟರ ಅತ್ಯದ್ಭುತ ಕವನ, ಮೈಸೂರು ಅನಂತಸ್ವಾಮಿಯವರ ಮನ ಮುಟ್ಟುವ ಸಂಗೀತ ಹಾಗೂ ಸುನೀತಾರವರ ಮಧುರ ಕಂಠ !!! ನಾನು ಮರುಳಾದೆ. ಎಲ್ಲಾ ಹಾಡುಗಳು ಚೆನ್ನಾಗಿವೆ. ಕೆಲವನ್ನು ನಾನು ಮುಂಚೆ ಕೇಳಿದ್ದೆ. ಆದರೆ ಈ ಹಾಡು ತುಂಬಾ ಇಷ್ಟವಾಯ್ತು, ಒಂದೇ ಸಲ ಕೇಳಿದಾಗ. ಅಯ್ಯೋ ಈ ಹಾಡನ್ನು ಮುಂಚೆ ನಾನು ಯಾಕೆ ಕೇಳಿರಲಿಲ್ಲ ಅನ್ನಿಸಿತು. ನಾವು ಪ್ರಾಥಮಿಕ ಹಾಗೂ ಪ್ರೌಢ ಶಾಲೆಗಳಲ್ಲಿ ಕೆಲವು ಪ್ರಸಿದ್ಧ ಕವಿಗಳ ಕವನಗಳನ್ನು ಕಲಿತಿದ್ವಿ. ಆದರೆ ಈ ಹಾಡು ಯಾಕೆ ನಮ್ಮ ಪಠ್ಯದಲ್ಲಿ ಇರಲಿಲ್ಲ ಅನ್ನಿಸಿತು. ಮತ್ತೆ ಮತ್ತೆ ಕೇಳಿದೆ. ಕವನ ಬರೆದುಕೊಂಡೆ. ಜೊತೆಗೆ ಹಾಡಿದೆ. ಎಷ್ಟೊಂದು ಅರ್ಥಗರ್ಭಿತವಾಗಿದೆ !! ತೂಗುತಿತ್ತು-ಸಾಗುತಿತ್ತು-ತೇಲುತಿತ್ತು-ಹೇಳುತಿತ್ತು ಎಂಬ ಪ್ರಾಸಗಳು ಎಷ್ಟು ಚೆನ್ನಾಗಿವೆ !! ಎಷ್ಟೊಂದು ಮಧುರವಾಗಿದೆ !!

ಈ ಹಾಡನ್ನು ಕೆಳಗಡೆ ಕೊಟ್ಟಿದ್ದೇನೆ. ಓದಿ, ಸೀಡಿ ಸಿಕ್ಕರೆ ಕೇಳಿ.


ಸಾಹಿತಿ : ಡಾ|| ಎಸ್. ವಿ. ಪರಮೇಶ್ವರ ಭಟ್
ಸಂಗೀತ : ಮೈಸೂರು ಅನಂತಸ್ವಾಮಿ
ಗಾಯಕಿ : ಸುನೀತಾ ಅನಂತಸ್ವಾಮಿ
ಒತ್ತಟ್ಟೆ : "ಎದೆ ತುಂಬಿ ಹಾಡಿದೆನು" - ಸಂಗೀತ ಲೈವ್ ಕ್ಯಾಸೆಟ್/ಆನಂದ್ ಆಡಿಯೋ - ಭಾಗ ೩೧

Song : "tiLi mugila toTTilali malagidda chaMdirana"
Lyrics : Dr. S. V. Parameshwara Bhat
Music : Mysore Ananthaswamy
Singer : Sunitha Ananthaswamy


ತಿಳಿಮುಗಿಲ ತೊಟ್ಟಿಲಲಿ ಮಲಗಿದ್ದ ಚಂದಿರನ
ಗಾಳಿ ಜೋಗುಳ ಹಾಡಿ ತೂಗುತಿತ್ತು

ಗರಿ ಮುದುರಿ ಮಲಗಿದ್ದ ಹಕ್ಕಿ ಗೂಡುಗಳಲ್ಲಿ
ಇರುಳು ಹೊಂಗಸ್ಹೂಡಿ ಸಾಗುತಿತ್ತು

ಮುಗುಳಿರುವ ಹೊದರಿನಲಿ ನರುಗಂಪಿನುದರದಲಿ
ಜೇನುಗನಸಿನಾ ಹಾಡು ತೇಲುತಿತ್ತು
ತುಂಬು ನೀರಿನ ಹೊಳೆಯಳಂಬಿಗನ ಕಿರುದೋಣಿ
ಪ್ರಸ್ಥಾನ ಗೀತೆಯನು ಹೇಳುತಿತ್ತು

ಬರುವ ಮುಂದಿನ ದಿನದ ನವನವೋದಯಕ್ಕಾಗಿ
ಪ್ರಕೃತಿ ತಪವಿರುವಂತೆ ತೋರುತಿತ್ತು
ಶಾಂತ ರೀತಿಯೊಳಿರುಳು ಮೆಲ್ಲ ಮೆಲ್ಲನೆ ಉರುಳಿ
ಬಾಳಿನಾ ಶುಭೋದಯ ಸಾರುತಿತ್ತು

ಇನ್ನೂ ಯಾವ ಹಾಡು ಇಷ್ಟವಾಗುತ್ತೆ ನೋಡೋಣ.

3 comments:

  1. sir,
    i was searching this poem from a long time.... thanks a lot for this.. :) i wish to see one more poem.. "china da ondu haleya kathe" by Dr.B.C. Ramachandra Sharma.. i partly remember that i had this poem in my kannada 1st language syllabus textbook - 'kannada kasthuri'

    ReplyDelete
  2. ಮನಸ್ಸನ್ನು ಸೆರೆ ಹಿಡಿಯುವ ಮಧುರ ಸಂಗೀತ... ನಿಮ್ಮ ಮಾಹಿತಿಗೆ ಧನ್ಯವಾದಗಳು ಸರ್... ಈ ಗೀತೆ ನನ್ನ ಸ್ನೇಹಿತ ಪವನ್ ಶೆಟ್ಟಿ ನೀಡಿದ, ಅವತ್ತಿನಿಂದ ಇದು ನನ್ನ ನೆಚ್ಚಿನ ಗೀತೆಗಳಲ್ಲಿ ಒಂದು...

    ReplyDelete
  3. In college days in seventies I heard this song in a high school competition.After that I never heard it again.After my retirement I tried to find out full lyrics.but I couldn't found it.Today I got missing two lines from your posting.Thank you very much.keep it up.

    ReplyDelete